2008年12月4 日，亞洲電視公布，委任前國泰及電訊盈科管理人張永霖及城市電訊主席王維基，分別擔任該公司的執行主席及行政總裁。
我對於該公司這次重大任命充滿信心，亦相信亞洲電視可以打破一直以來一沉不起的局面。
當天的記者會，我一直坐在家中觀看整個直播，而且亦一邊看一邊拍掌、一邊大叫。這是我有生以來看過最好的一個記者會。最後我守到半夜，錄影了有線直播新聞台重播的記者會。
雖然考試在即，但我也忍不了，重看這個記者會多達3次。
有人認為亞視今次任命，最後也無法改變二奶台的局面。他們通常都會提出這幾個原因支持其想法。 1) 無錢 2) 慣性收視 相信你同我都睇到，當然張永霖同王維基都睇到。不過我唔認為，呢兩個問題會係亞視翻身嘅阻力。 1) 張永霖已經否認，查氏家族會停止注資。當然，管理層委任上述兩人，都有改革的打算，因此投資者早就預期需要繼續投資。何況，就是不轉換管理層，亞視每天運作亦需要資金，而亞視收入少，投資者基本上每天都需要注資。 亞視投資者唔只查氏家族，仲有荷蘭銀行(皇家蘇格蘭銀行)、中信集團、鳳凰衛視有關人士等。荷蘭而家無乜銀用，佢唔畀錢唔奇，查氏家族又可能唔係有好多錢。不過，中信集團要攞錢出嚟，一定唔會唔無，佢點畀同埋畀幾多就另一回事。 入股一間公司投資，至少都會睇佢三、五年。新股東上年先入股，而家玩咗一年，我估佢哋錢彈都應該未玩晒。佢仲有幾多我真係唔知，但點都唔似會無晒錢。搵到張永霖同王維基，都可以話係最後一著，因為兩個都已經係精英中嘅精英。最後一著的話，點都會仲有啲錢畀佢哋玩。更有可能嘅係，佢哋係留咗一大筆錢賭最後一舖，死就死。 最後，張永霖同王維基兩個人都不是白痴，若亞視再沒有投資，他們兩人都不會加入。入去人工都唔係多，我亦唔相信佢兩個人會貪心唔高嘅人工，做樣咁惡做嘅嘢。另外，王維基一直都唔係以錢搵錢的人，佢都話明自己係巧婦，煲慣小米粥(無米粥)，所以佢哋都唔會好需要要好大筆嘅資金，將亞視改革。 2)慣性收視的確係有。每個星期尾嘅收視調查，都講咗亞視好唔掂。不過，王維基都講咗，佢唔會玩Drama。佢話人哋做得好嘅嘢佢唔會做。你睇返個市場，夜晚睇Drama嘅人約300萬人，就算亞視做得好，而無線短期計，做Drama嘅質素又唔會點下降，咁即係佢兩個間公司每人會分150人收視。 無線贏晒，經營都唔係話咁舒服，咁亞視贏多150萬人返來，都唔見得有乜好處。 唔玩嗰300萬人，仲有400萬人。當然，淨返嗰400萬人又好可能想睇電視都睇唔到，又或者係認真唔多睇電視嘅人，7除8扣，應該可以頂住收支平衡。食大茶飯嘅張永霖就講，佢係想衝出去全世界。我估佢又未必可以短期內成為世界性嘅廣播機構，我講你都唔信。大家又會諗，唔係香港，咁就應該係中國。不過，王維基都講過，佢唔係同中國好有關係嘅人，打入中國都唔見得容易，特別係而家中國電視業嘅發展已經起步。 好似條條路都唔得，咁又有乜出路呢?
我做佢可能有兩條路。
一) 內容供應者。
傳統電視台係內容供應商，又係媒界。若果佢主力做內容供應，然後賣出去，咁就可以以最低成本打出海外。大家睇National Geographic, Discovery, Fox, BBC....等等等等，都唔洗響香港開個台，佢只係賣內容。
亞洲區嘅高質素內容供應商唔多，大中華區都無乜。亞視行呢條路，先主攻大中華市場，賣普通話嘅資訊、教育等唔同類型嘅片，應該有得玩。
拍一套戲劇，成本點都唔會平。拍一套教育節目，反而仲平，而且賣片可以賣畀好多地區，因為學術，文化差異影響唔大，好多地方都可以睇，套英文字幕又可以買畀歐美。呢一個係低成本高增值嘅路。
仲有，類似嘅片唔只可以賣畀電視台播，仲可以賣畀機構、賣畀大學、賣畀普羅大眾。
點都好，行呢條路一定唔可以再以香港口味為主，一定要睇全世界，少極都要大中華。其實而家嘅National Geographic, Discovery, Fox, BBC等媒體，所包括嘅類別都唔係咁多，仲有好多發展空間。我舉一個例子，我相信專講電腦Gadget、專講遊艇、專講電玩、專講飲酒嘅頻道都唔多。若果等別係服務亞洲區嘅頻道就更少。呢一個market大到不得了，你拍一條片，又可以賣畀好多地方。
二) 財經電視台
睇Bloomberg, 睇CNBC。美國可以有咁嘅頻道，香港作為大中華，甚至亞洲區主要交易市場，要做一個都一定唔難。不過，香港就無，係一個都無。我舉個例，全世界好多人會投資中國、香港股票，但佢哋對中、香企業嘅認知又唔會好多，想知都唔多途徑。若果有電視台拍英文節目，專訪每一個企業，又搵專家(唔係所謂股評人)做分析，咁就可以賣畀美洲、歐洲。當然，自己亞洲都可以玩。
若果亞視行呢條路，又係唔可以將個焦點放響香港，乜鬼股神、股評員、乜乜大師都唔係佢哋要請來嘅人。每一個行業都要請專家，睇係睇個行業，唔係睇個市場，乜乜中線、短線、跌蝕位，唔該全部bye bye。
記者會間，當中王維基有好多精妙嘅對答。下面其中一句，我非常喜歡 王維基：「你都知我係巧婦，你亦都知我從來都係煲無米粥……你應該只我唔係靠好多錢起家……如果講錢多，香港有好多大財團……如果講錢多，我估今日唔需要有張永霖同埋王維基坐響度。」 王維基：「醒嘅時候返亞視，發夢嘅時候返城電。」 王維基：「我好憎靠人家，我覺得香港人係有尊嚴，香港人係應該靠我哋自己香港人，香港人係唔應該成日問阿爺攞嘢。即係香港人成日問阿爺攞嘢呢，其實係一種丟面嘅事嚟。有本事就自己自己砌自己打，無本事就唔好做香港人。」 張永霖：「我哋會背對背，無人可以分化我哋同埋玩矛盾。」 王維基馬上回答記者：「笑咩嘢啫。斷背山吖嗎，我知你諗乜喇…咁大聲講，我唔聾吖嗎，真係。」 王維基：「intel都係因為咁樣樣呢，變咗今日嘅intel喳，因為做memory嘅時候做唔掂，差啲…即係…唔玩喇…做唔掂memory喎做CPU喇，所以先至有今日喳嗎。」 王維基：「我唔識國內人嘅品味嘅，如果你想將呢一個台變為國內台呢，唔關我事，我無興趣。」 王維基面對亞視國際台記者的提問，更反問該同事：「Instead of answering your questions, may I ask, since you are our colleague, how happy you are with our company today?」該同事十分尷尬，未有回答。最後，王維基對裁員問題，向她回答：「Well, in case there is really a cost cutting, if it's happen, I think the remaining staff will be very happy! I will make sure all the remaining staff much happier than today.」 王維基：「無喎，我哋張約無寫幾多年喎，呢將唔係一樣一年、兩年、三年……唔係咁樣喎。」 張永霖：「婚姻證書有無寫架？」 王維基被問會否請被無線裁走嘅員工時答：「在坐我諗……乜嘢人都有喎，香港電訊嘅又有、無線嘅……喂！呢個江湖其實好細，在坐好多Cable嗰啲，可能以前係隔離台做過呀，NOW嘅都可能喺隔離台做過呀。嘅個江湖來來去去都係呢三、四個台……我諗，出身、喺邊間台做過並唔係我哋嘅考慮。」
文章
