木蘭詞

納蘭性德

人生若只如初見，何事秋風悲畫扇。
等閒變卻故人心，卻道故人心易變。
驪山語罷清宵半，淚雨霖鈴終不怨。
何如薄倖錦衣郎，比翼連枝當日願。

鴻海科技集團

鴻海科技集團，即係大家所講嘅富士康。

近期大家對鴻海有更多認識，都拜啲人係咁跳樓所至。

好多人都對呢個咁奇特嘅事件有好多唔同分析，好似話係鐵腕管理、壓力大、不斷加班。

我暫時無法求證上述理由係咪唔係令人跳樓嘅主因，但係我又想知，用上述理由去推斷嘅人，又有無求證過，以前未有咁多人跳樓嘅時候，富士康係咪無行鐵腕管理、員工壓力又唔大、又唔洗不斷加班。

我唔係話上述問題完全唔係問題，但個問題有幾大呢?係咪近期問題繼續惡化到超過臨界值，所以啲人先跳樓呢?若果一直都係咁，又點解而家先有人跳樓呢?

若果解答唔到呢啲問題，什麼鐵腕管理、壓力大、不斷加班等等等等的推斷，都係無乜料到嘅「垃圾」。

好多分析都係亂嚟，例如一些blog 寫話富士康高、低技術產品都做；需求又大增，人力資源可能應付不來，再瘋狂向員工加壓，令工作變成不可能的任務。

同一間公司乜都做，又如何?Sony 拍電影、電視頻道、廣播器材、數碼相機、Software(Sony Creative)，都係乜都做仲未計會outsource 出去嘅電視、收音機、PS3、notebook、Memory Card，層面仲大過富士康，咁Sony呢10年又有幾多員工自殺先?

和黃又係，物業發展、零售、電訊、投資、港口、酒店、傳媒…等等等等，又係乜都做，仲要佢全世界咁多投資咁多公司，又有咁多瓣數，一年應該跳幾萬人。

第二，做得多嘢咪請多啲人囉，係咁佢接單量同請人量一直唔成正比，做極都做唔晒先。可能係都唔定，但blog 內無數據可反映，又係得個吹字。另一個質疑，就係佢係咁迫班人做，請唔夠人嘅話，最後都係交唔到單，因為迫盡都係做24個鐘做唔停。交唔到單嘅代價一定高過請人。富士康請唔到人?年年都排長龍，多到任佢揀。

最後，唔知寫blog 嗰個知唔知富士康對唔同類型嘅生產係咪分廠房開工，跳樓嘅深圳廠房，又係負責乜類型嘅生產。富士康全世界都有廠房，點解淨係深圳廠房有事發生，係咪因為佢真係有如某人所講，淨係深圳間廠就乜高、低技術嘅產品都要做，而且又請唔夠人，迫死班工人呢?不過我都幾肯定，寫嗰個都唔知富士康全球仲有邊度有廠，唔同廠房又係做啲乜。無睇清楚，又無了解過，又係咁樣講。你分析唔到，拿埋一堆係咁講，無條理又無數據。

又話乜嘢「這就是中國」、「見人仆街自己好HIGH」、「支那化」……挑！