開工

我個人認為，開工其中一個有人工收的理由，就係因為無自由。

時間上無自由
就算你的工作十分獨立，每人絕大部分時間都唔洗點同人溝通，只係需要處理文書，但你在上班時間的選擇都很低。做文職的就會朝九晚五，而做營業的就係交易時間。就算你係做裝修，你自己一個人在客人的家中工作，客人畀埋條鎖匙你隨時進場，但若果你做住家的，就要在日頭做；做寫字樓的，就要五點後先做得，又係定好晒。仲有，就算你想做早一個鐘，收早一個鐘又唔得；或者怕做唔晒，即早一個鐘返工都未必有入開門畀你入。

工作無樂趣
樂趣好個人，但工作就一定唔個人。就算你份工係寫遊戲雜誌，日日畀機你打，你都打得唔過癮，因為你唔可以話你覺得隻game悶就唔打；又要以最快時間打爆機兼搵到最多秘密，你有一個stage覺得好好玩都唔可以淨係乾打佢。你好鍾意車，畀你日日做司機，但同自己開車又唔同。開車工作係有目的，你去邊、點去、幾時去、去到停幾耐都唔係由你揀。

有責任
例如你為興趣做的事，好似寫文章咁，寫得唔好、無心機寫，大可以唔寫住，更甚至唔寫。你自己的事就無時限、無責任、無壓力，鍾意點就點。若果你做記者，你寫得唔好要再寫過，而且仲係要限時內寫返好佢。你好無興趣做的故事，又係要咁樣做，公司最大只可以容忍你做得無你有興趣的咁好，但仍然要好，要達標。

不過，返工好似唔係咁好，但有o野畀你做都算係咁，最怕係你坐喺公司，時間已經畀佢買起，但坐響公司無o野做，但你又唔可以做其它o野，莫講話自己o野，就連係你同事的o野，第二個部問的工作，你都唔可以做。坐監都話有時間你打波，你返工就係咁乾坐，坐到收工。若果日日畀錢你，淨係坐足十個鐘，除o左去洗手間之外，乜都唔做得，我估真係唔係咁多人可以頂得順。