兩個女人

有人話，你點揀老婆，唔多唔少係同你媽媽係點有莫大關係。我有少少信，但係又無乜實質例子肯定，因為我可能好認識身邊的人，但對他的媽媽就唔好了解；對佢女朋友或老婆又無乜認知。

以前細個想食乜，就同阿媽講；而家放工想食乜，就同老婆講。以前細個返學前會問阿媽：「我對襪唔見咗呀，知唔知喺邊呀?」相同的說話，可能在十幾年後發生，男主角一樣，劇本亦一樣，只是女主角換了人選。

小時你在學校有事發生，你總怕跟媽媽說；大了在社會出事，相信先找朋友的次數亦同樣比找太太的次數多。同樣，無論任何時候，你都會對你朋友說：「唔好爆畀我阿媽／老婆知呀。」

不過記住，你可以同你媽媽討論你外母點煩點衰，但同時間絕不能同你老婆講你出面的另一個女人點要錢點困身。(所以話呢；世上只有媽媽好。)

老婆總愛問，若果我同你媽媽一些跌落海，你會救邊個先。我一定答：「係?乜你咁睇少你老公。我咁叻，一定兩個都救得晒。乜你對自己眼光咁無信心呀?」跟住很有自信地笑，抱實我老婆。