養壞個仔要四球

(先指聲明，下列內容為保持原汁原味，粗口橫飛，同而家立會陳議員講嘢用字無乜分別)

生個仔出來，總想個仔生活好一點。雖然我未有如此福氣，但若果有我就反返轉，想個仔辛苦啲。

我老豆嗰一代人(我指係嗰一代整體情況，唔係淨係講我屋企)，六、七個兄弟姊妹迫埋一間房，入小學就要幫屋企手賺錢，咪有係咁樣大。我有問過我的老細，佢同我老豆差唔多大。佢話：「咪又係咁x樣生活。以前有兄弟姊妹，仲開心。老豆老母唔x響度時，大家姐咪係第二個老母，我哋唔讀書咪打x到我地飛起。佢做埋老母嗰分，咪一樣讀到書，仲差啲就讀到大學，係屋企無錢供佢，佢咪要出嚟做嘢，幫屋企手供我哋讀書。」

「咁佢咪好x灰？」

「佢而家都讀完Master九世喇。有心讀，點會有得讀，香港好x公平。三哥出身後，佢咪有錢囉，之後咪有讀到。而家啲細路都無x心機讀書。世界好，唔知辛苦，屋企大爺咁x樣。我得個獨女，中四喇，乜都唔x諗。早知我就唔好咁縱佢，等佢知道世界艱難。」

類似嘅故事，我從我老豆口中都有聽過。

「以前阿爺個邊個邊個朋友，我都識，你細細個都去過佢屋企。其實佢好x有錢，但佢生咗個仔後，怕個仔會畀錢縱懷，所以由大屋搬細屋，又賣埋架車，等個仔無乜物質享受。佢就堅呀，為x咗對仔女，真係捱足廿年無得享無得玩，就係想對仔女知道世界唔易撈。佢對仔女最後都好x生性，完全唔二世祖，兩個都出生得好，自己搵到，阿爺啲生身家兩個唔都願爭，個老豆死得眼閉呀。」