2009年1月28日星期三

音樂 - 音樂儲存及格式

黑膠唱片將音樂紀錄及保存的方式揭開了新一頁。

流行的音樂紀錄方式包括黑膠唱片、錄音帶、鐳射唱片、MD等;若果係Hi-Fi玩家嘅話仲應該會知道有樣嘢叫DAT, dcc, SACD等。

無論用乜嘢方式儲存檔案,其實當中都包括兩樣嘢,就係儲存介質同格式。

到咗而家,大家都唔會再再理會儲存方式入面嘅格式,例如CD, DAT 係用PCM、SACD就係用 DSD、MD就係用ATARC。

理論上,CD都可以行DSD,而事實上其後發展嘅MD係可以行PCM,Hybrid 嘅SACD亦係行PCM。

個道理就好似你可以將一個文件製作成txt, word doc, pdf,又可以scan 做 tif, jpeg,呢個就係格式。呢一個file又可以儲存響你個harddisk,你又可以燒落CD,又或者你放入手指入面。


到咗而家,大家都應該唔會唔知乜嘢係mp3。經過多年發展,mp3已經係一個極高支援性嘅檔案。你部電部係行Windows XP 加Windows Media Player嘅話,一定開到mp3。而家無論係手機、所謂嘅mp3機、DVD機都能夠play到mp3。

除咗mp3外,仲有其他唔同類型嘅格式,包括wma, lossless wma, aa3, aac, ra 等等。

講返mp3,其實mp3跟本就唔係一個理想嘅format,因為佢係會將音樂有破壞地壓縮。無論你係用128kbit, 256kbit, 320kit ,都一定唔會高過原本CD嘅質素。mp3係會將好多聲音資訊消除,好多假設人耳唔係咁聽得到嘅聲音都會無咗。

若然大家經常強調對音樂質素有要求,會大大聲聲話畀人聽你會用shure SE530嘅話,請大家順便用CD/DAT聽歌,一係就將CD轉做wav,即係CD原本嘅PCM format。

我唔係話PCM 係一個好出色嘅格式,但至少一定唔會差過mp3。只要用digital來記錄音樂,就一定有loss。

我見過大把人,聽mp3但係用shure 耳筒,以為自己好識聽歌咁。聽mp3嘅話,我畀唔到一個理由我買一對過$500嘅耳筒。呢個世界好多白痴仔,隨街都見到一班。

想知mp3 同 PCM有乜分別,自己將同一隻歌分別以 mp3同wav錄落你部mp3機度,自己聽幾次,就會發現好大分別。就算你唔係乜HiFi耳,都會聽到兩樣係好唔同嘅嘢。

4 則留言:

收買佬 說...

我想我的兩隻耳仔非常廢﹐因為我都係聽唔出mp3 同 cd 有乜分別。

小女子 說...

依加都無人理咩格式架啦 … 係要有 d 野聽,覺得自己型 d 囉 …

分別在於,你用 IPOP 定電話聽

過內人 說...

收兄:

新年好!祝你財源廣進,老婆仔仔都健健康康,聽晒你話先。

你真係聽唔出?我錄兩隻歌畀你聽,你聽幾次就會知道分別。

過內人 說...

小女子:

最大問題係用Shure 呢啲所謂貴嘢,當然仲可能包括B&O等等…,但係聽緊128kbit mp3,然後周圍同人講話自己對音質有好高要求囉。

我都係聽256kb mp3,因為我只用手機聽,而且耳筒亦只係唔過$200.00 嘅 Audio Technica