家庭煮婦

我所說的並非是家庭主婦，而是家庭煮婦。

剛看到最新一輯《蘇 Good》，看到那些貌似家庭主婦的人，炒滑蛋炒到又乾又硬，最後阿蘇食都唔食。被批評的其中一名參與者很不服氣，她說：「佢食都唔食。」其實看到這樣的蛋，對不起，我也不會食。

當我細個以為淨係女人先識煮飯，因為屋企通常係女人煮，放學返到屋企一點半，又係女人教煮飯，到大個先發現，原來出面絕大部分做廚都係男人。blog 圈中某人，煮嘢食有返咁上下，我相信大家都知。老老實實，我不介意你是無飯主婦，唔識或者唔想都無計，反正每個人興趣唔同。

不過，好多好多家庭主婦以為自己是家庭煮婦，自己唔識煮，屋企局食或啫畀面你先食，並唔代表好食。你煮咗十幾年都煮到咁，好心喇。有部分相熟朋友，話自己大家大細都係佢煮，個個都食到咁大。小姐，煮得好難食，由細食到大，只係習慣咗，更何況要食大啲小朋友容乜易，但有營養之餘兼好食，就係重點。

有啲人獻醜煮完之後畀我狠批，就會咁講：「家庭小菜啫。」其實呢一個理由並唔成立，第一，「小菜」只係個名，唔代表求其；第二，好唔好食，無家庭同餐廳之分。

我好理解你屋企唔會每晩凌晨煲定上湯、高湯，你亦唔會有幾個分別用嚟走油、炸嘢嘅鑊，更加唔會自己去廠訂唔同嘅生抽、老抽。唔緊要，你話到名煮家庭小菜，但我再強調，小菜唔洗你咁多架生啫，無話可以唔好食。我真係見過西芹炒魷魚，魷魚唔起花都算，仲要成隻炒，炒完乾到薄獻都唔打。生粉水啫，有幾煩呀！

仲有一點，千祈唔好用健康嚟做「擋箭牌」話唔落豬肉呀、落少啲油呀，唔好炸呀。有啲菜係咁整，你一係就唔好整，你一係就用一用你個腦，諗一諗點樣可以又少油又好食。無人話好食嘅嘢一定唔健康，兩者唔會整味味嘢都會出現對立。我保證，呢啲所謂嘅家庭煮婦，就連白切雞都唔會整得好食。好食嘅話，你日日整面包都好食。仲有，真係咁有心想屋企人健康，拉埋屋企人星期日去行山游水咪得囉，唔食油唔等如健康喎。

有次有機會整公仔面畀大家食，我朋友話，乜原來公仔面咁好食。我有少少驚訝：「乜公仔面會難食o架咩。」原來，佢阿媽連公仔面都唔識煮，係水未熱就放面兼放味精，水熱咗先計3分鐘，咁個面就唔彈之餘，味精水又整得太耐，所以會有少少似苦嘅味。有心整公仔面嘅話，3分30秒後即拿起沖凍水；湯唔好用最熱水開。

真係有心想整好嘢嘅話，由早餐開始，學吓點樣揀面包，點樣處理大大片嘅西生菜，點樣煎隻唔會爛黃嘅蛋，點樣煲粥先好食又唔起水，由早餐慢慢做到晚餐喇。