打印機

當電腦越來越普及，而可以上網做到的服務越來越多時，一台打印機就變得十分重要。

印Coupon、地圖、單據、收條……等等。

當然，你可以返公司慢慢Print。

其實大部份情況下，返公司Print嘢都幾好，因為又唔洗錢，又用Laser，又快又好。不過，到你急嘅時候，返公司就好唔方便，例如你星期日要去一個你唔熟識嘅地方，你想印張地圖出嚟，就無理由返公司印。

有時候亦可能係你放工返屋企做埋少少嘢，聽日開會用。若果屋企無Printer ，就要先搭車返工，再去開會地方，本來可以瞓多陣，點知仲要早起身。

而家啲家用Printer，多功能嘅Inkjet 都係幾百蚊，有得Scan, Copy，方便都不得了。Scan 功能好有用，例如你見到睇完本雜誌唔要，但中間有一、兩頁想Keep，你部幾百蚊嘅嘢就可以幫到你。

另外，有時想申請嘢，用嚟影印一兩張又係方便，好過落街搵舖頭。

近期買Mac 送 HP 多功能 Printer，好多人放上網賣，400幾就有一部，Print, Scan, Copy 兼有埋Wifi。

有Wifi 簡直係香港寸金呎土地方的最佳功能。假設你房張電腦桌唔夠大，放得Desktop 又放唔到Printer ，放響廳又無可能拖到咁張USB線，咁有Wifi 就正喇，放響廳又得，放響梳化底、角落位又得，跨張到放響廚房、廁所都得，因為連Lan 線都唔洗拉，有個電制就可以。

若果你真係搵唔到啲MAC贈品嘅放盤，呢部HP B110a機標價$888，街價約$560。
HP 仲有樣嘢好，就係有代用墨，成本大幅減低。部B110a要用代墨可能煩啲，因為要將原裝墨塊晶片挑出嚟放落代用墨個墨盒度，但反正新機都有墨送，即係唔會有額外成本。仲用，呢部機有樣好，就係彩色墨盒係獨立墨盒。

代用墨盒一套先100，一支墨水幾十蚊可以refill 成7次，refill 又唔難，正到爆！！
你一開頭買齊一套連墨可能重皮過買原裝，但第二已回本，第三次就賺。HP仲有樣嘢好，就係用代用墨最少問題，又唔會塞墨頭，又唔會有明顥偏色問題。