電視(二)

了解到乜係模擬／數碼後，咁就可以再進一步，就係高清／標清。

頭先提及過，模擬／數碼只係點樣將個畫面變成可以廣播嘅技術，跟本同個內容無關。不過，標清／高清某程度上就同個內容有少少關係。

而家所講的標清，就係大概有4:3 DVD咁嘅質素，其實已經唔差，但只係叫標清。而家模擬廣播的質素根本就係標清。至於新加嘅高清就係質素上比標清高好多嘅一個格式，畫面更細緻，色彩更鮮艷。另外，高清係以16:9格式廣播，所以個畫面會更闊，更切合人眼視線。

以香港嘅情況，若以無線計，標清台同高清台所睇嘅畫面會係好接近，而唔同嘅就係，若果你睇劇集，你睇高清就可以睇到左右擴闊嘅畫面，而且畫面更會更細緻。至於若果你用模擬標清同數碼標清比較，理論上根本無乜分別，因為大家都係4:3畫面，數碼標清都唔會睇闊咗，而且理論上兩者播放質素都係同DVD差唔多。

基於以上的解釋，可能大家都了解到其實模擬／數碼；標清／高清兩者之間係無絕對關係，基本上可以講電視台可以有以下四個組合作擴播技術。

模擬　標清
模擬　高清
數碼　標清
數碼　高清

好，大家可能有問題。首先，既然而家模擬廣播都係標清，咁同質素下，點解又有數碼標清??同係睇標清質素啫，咁點解要整個數碼出嚟呢，係唔係無謂呢??