電視（一）

身邊的人，都問我高清/標清；模擬/數碼；機頂盒等等等等的問題。

我認為可笑但實在不容易令人理解的問題有很多，例如：

係唔係要買LCD先睇到高清，唔洗機頂盒?
係唔係大廈提升系統就睇到高清?
乜淨係室內天線先可以收高清咩?
係唔係高清即係數碼?
係唔係唔換電視無得睇電視?

要解釋咁多問題，其實首先要明白以下的幾點?

1) 模擬／數碼
某程度上，模擬或者數碼只係廣播技術入面的語言。由電視台發出來的信號，可以用好多方法傳播。電視台將「畫面」先變成「電磁波」，響大氣傳送，而個電磁波個形態跟本就唔係個畫面。我咁講，你望到個發射站，但你唔會見到個發射站有畫面傳出去，你亦都見唔到你條天線收緊個畫面，因為發射站只係發「電磁波」，而唔係「畫面」；天線亦只係接收「電磁波」。

接收到電磁波，先會變成影像電訊，再變成原本個畫面響你電視視上面顯示。

講返模擬／數碼，佢某程度上只係一種點樣以「電磁波」演繹個「畫面」的方式。好似以前你聽歌，同一專輯可以買錄音帶或者買CD，佢技術上有唔同，但你都係聽緊同一個歌手的歌。

好似我講一組數字畀你聽咁，我可以用阿拉伯數字2225517，可以用中文二二二五五一七，可以用英文triple two double five one seven。表達內容一樣，但演繹方式唔同。

香港廣播方式

免費電視　　數碼／模擬同步
now TV 　 數碼
有線電視　　數碼
收音機　　　模擬

我舉多個例，其實你聽收音機，都有網上同步。其實收音機除以電磁波以模擬作廣播外，亦接近同步地在互聯網作數碼廣播。

兩者某程度上無分別，你所收聽的內容都是一樣。